USAJILI wa Chama Yanga Sinema Ile Ile
USAJILI wa Chama Yanga Sinema Ile Ile
USAJILI wa Chama Yanga Sinema Ile Ile
USAJILI wa Chama Yanga Sinema Ile Ile, Wakati mchakato wa usajili wa wachezaji wa ndani na nje ya Tanzania kuelekea maandalizi ya msimu mpya ukiendelea, imeeleza kuwa Simba wanawachelewesha watani zao, Yanga kumtangaza kiungo, Clatous Chama.
Chama amekataa kusaini mkataba mpya wa kuendelea kuitumikia Simba kwa sababu hawajafikia kiwango cha fedha ambacho amekihitaji wakidai hastahili kulipwa kutokana na umri na kiwango chake cha sasa huku tetesi zikieleza Mzambia huyo tayari ameshamalizana na Yanga.
Ofisa Habari wa Yanga, Ali Kamwe, alisema wanachelewa kutangaza majina ya wachezaji walioachwa na wapya ambao wamewasajili kutokana na baadhi ya klabu kutokamilisha mchakato wa kuachana na nyota wao.
Kamwe bila kutaja majina, alisema kuna klabu zinachelewa kuwapa barua za ‘kwaheri‘ nyota wao kwa hofu ya kujiunga na Yanga na hali hiyo imezua wasiwasi kwa wanachama na mashabiki wa Simba hasa wapi anakwenda kiungo huyo.
“Kuna mchezaji mmoja anamaliza mkataba, lakini jamaa hawataki kumpa barua, wana hofu atakuja kwetu, wampe tu kijana wa watu ili aje kwenye klabu ya ndoto yake, na hilo ndilo limetufanya mpaka sasa tuahirishe au tuchelewe kuwapa “Thank You’ tutakaoachana nao na kutangaza wachezaji wapya ambao tumewasajili,” alisema Kamwe.
Taarifa kutoka Simba zinasema mkataba wa Chama na Simba umebakiza siku chache na sasa kanuni zinamruhusu kufanya mazungumzo na timu yoyote inayohitaji huduma yake.
Mkataba wa Klabu ya Simba na Chama unamalizika ifikapo Juni 30, na baada ya hapo anakuwa huru, huku taarifa zikidai kuwa tayari ameshazungumza na Yanga, pande zote mbili zimekubaliana wanasubiri mkataba wake uishe ndipo asaini mkataba.
